خربشات وطنية

شي عالماشي

اول سؤال عم يشغلي بالي هوي ايمتى بدو يوصل الDSL على دير الزهراني؟ انو كيف وصل عالنبطية ورجع كوّع عالدورة؟! مش عم تركب ع راسي…
أيمتى بدا تصير تجي الكهربا 24 24/؟ رح نوصل لهالنهار يلي بتضل جايي فيه الكهربا وما تقطع مع اول هبة هوا؟ ولا مش ع ايامنا؟
أيمتى رح يصير عنا دولة؟ ويصير كل طالب عندو وظيفة دغري بعد ما يتخرّج؟ وأيمتى رح يرجعوا المغتربين ولا كمان صعبة؟
عال لغينا الطائفة عن اخراج القيد بس لشو اخراج القيد اصلا اذا كلنا صار معنا هويّات؟ واصلا اذا لغينا الطائفة او المذهب بالشكل ايمتى رح تنلغى الطائفية من نفوسنا ويبطل شاغلنا بالنا سؤال انت شو طائفتك وشو مذهبك وشو دينك؟
أيمتى رح توقف المحاصصة بالادارات الخاصة والعامة ويبطل كل زعيم يقول هيدا من جماعتي بحطوا بهالوظيفة لانو بيخصني وحتى لو كان حمار؟! ابنك ذكي يا ثريا بس حمار…
أيمتى رح نصير نتقبل التاني حتى لو كان رأيو مثلا انو سمير جعجع زعيم وطني وبيحب لبنان وما تعامل مع اسرائيل الا كرمال عيون لبنان! شو فيها طيب حر الزلمي فينا نناقشو بالسياسة من هلق لتقوم القيامة مش ضروري تقتلو. يمكن هوي ما بيحب جعجع بس نكاية بعون نزل ع ساحة الشهداء بذكرى الحريري ويمكن ما كان طايق الحريري هوي وعايش وصار يحبو بعد ما مات شو فيها بتصير, ما بتصير؟ مبلى مبلى بتصير…
مش عم بفهم ليش ال msn messenger بيعلّ القلب ليمشي والياهو دغري عالسريع يشتغل؟ عنجد شغلة بتقهر, على ما يبدو انو الياهو أقوى يلا شباب ولع المشكل…
ايه شو كمان؟
ايه ايمتى الحب بدو يرجع متل قبل صادق وصافي وبلا مصالح؟ ايمتى بدو يخف الكذب بين البشر؟ انتبهوا مش عم قول يبطل موجود لانو صعبة! الله خلق الكون خير وشر وطبيعي يكون في كذب بس مش هالقد كمان ولو!
على سيرة الهوية انا وعم بكتب هلق وصلتني رسالة قال شو: اذا هويتك معك مش يعني بتنتخب ارسل اسمك الى (1378) وتأكد انو في لوائح الشطب… خلصت الرسالة. ليك ملا نكتة شو فرقانة معي انا اصلا ايه معي هوية بس انو الهوية رح تغيّر شي بنتائج الانتخابات مثلا؟ مش رح ينجح ولا واحد من لوائح 14 آذار؟ وأصلا لشو بدي انتخب اذا رح يزوروا النتائج متل كل مرة ويطلع واحد متل الياس عطالله نائب ويسقط سليمان فرنجية!
لنرجع للاسئلة: ايمتى بدو يفل صفير عن كرسي البطريركية؟ مش انو عم بتدخل بشي ما بيعنيني اعوذ بالله بس هالزلمي زاعجني هوي وتصريحاتو لو بيخخفها شوي بس وببطل ينط كل ليلة بنشرة أخبار ال LBC , بالمناسبة وين صارت القضية بين بيار الضاهر والنص حكيم! ( هوي ما كفّى اختصاصو ولا حتى عم بيمارس مهنة الطب ع شو بيعيطولو حكيم).

Remember: think and comment "out of the box"

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s